4. ജാതി ചോദിക്കരുത്, പറയരുത്, ???

                               'ഒരു ജാതി പ്രശ്നം'
                           പുതിയതായി പി.എസ്.സി. നിയമനം ലഭിച്ച ഇം‌ഗ്ലീഷ് ടീച്ചര്‍ സ്ക്കൂളില്‍ വന്ന ദിവസംതന്നെ, ജയരാജന്‍ മാസ്റ്റര്‍ വളരെ പ്രധാനപ്പെട്ട ഒരു കാര്യം എന്നെ ഏല്പിച്ചതാണ്… ആ ടീച്ചറുടെ ജാതിയൊന്ന് കണ്ടുപിടിക്കാന്‍. ജാതി ചോദിക്കരുത്, പറയരുത്, വിചാരിക്കരുത്, എന്ന പൊതു തത്വം അംഗീകരിക്കുന്നുണ്ടെങ്കിലും രണ്ട് പിള്ളേരുടെ അച്ഛനായ മാസ്റ്റര്‍ അവളുടെ ജാതി കണ്ടെത്താന്‍ ശ്രമിക്കുന്നത് വളരെ പ്രധാനപ്പെട്ട ഒരു ആവശ്യത്തിനാണ്. പുരനിറഞ്ഞു നില്‍ക്കുന്ന അദ്ദേഹത്തിന്റെ അളിയനെ ഒരു കല്ല്യാണം കഴിപ്പിക്കണം. ഇതിനായി ശ്രമം തുടങ്ങിയിട്ട് നാല് വര്‍ഷമായി.

…
മാസ്റ്ററുടെ അളിയന്‍ ഗള്‍ഫില്‍ ഉയര്‍ന്ന ജോലിയാണെന്ന് സ്ക്കൂളിലെ തൂണുകള്‍ക്കു പോലും അറിയാം. അളിയന്റെ കീഴില്‍ ധാരാളം അറബികള്‍ ജോലിചെയ്യുന്നുണ്ടെന്നാണ് അദ്ദേഹം അറിയിച്ചത്. അളിയന്‍ ഗള്‍ഫില്‍ നിന്നും വന്നാല്‍ സഹപ്രവര്‍ത്തകര്‍ക്ക് ഒരു പാര്‍ട്ടി നടത്തുന്നതോടൊപ്പം സമ്മാനങ്ങളും നല്‍കുക പതിവാണ്.

…
നമ്മുടെ പൂര്‍വ്വികന്മാര്‍ തൊഴിലിന്റെ പേരില്‍ ജാതിതിരിച്ചപ്പോള്‍ ഏറ്റവും ഉയര്‍ന്ന തൊഴില്‍ ചെയ്യുന്ന ജാതിയിലാണ് ജയരാജന്‍ മാസ്റ്റര്‍ ഉള്‍പ്പെടുന്നത്. അദ്ദേഹത്തിന്റെ ജാതിയാണോ എന്ന് എളുപ്പത്തില്‍ മറ്റുള്ളവരോട് ചോദിച്ചാല്‍ അറിയാം…
അതെങ്ങിനെയെന്നോ? ഒരാളോട് ജാതി ചോദിച്ചാല്‍ മറുപടി പറയുന്നതിനു പകരം ജാതി ചോദിക്കാനോ പറയാനോ പാടില്ല, മനുഷ്യരെല്ലാം ഒരേജാതിയാണെന്ന് മറുപടി പറയുന്നുണ്ടെങ്കില്‍ ആ വ്യക്തി ജയരാജന്‍ മാസ്റ്റരുടെ ജാതിയായിരിക്കും.

…
ഇംഗ്ലീഷ് ടീച്ചറുടെ ജാതി ചോദിക്കാന്‍ എന്നെ ഏല്പിക്കാന്‍ ഒരു പ്രത്യേക കാരണം ഉണ്ട്. ജില്ല മുഴുവന്‍ പെണ്ണു കാണാന്‍ പോയിട്ട് ഒന്നിനെപോലും പിടിക്കാത്ത എന്റെ ആങ്ങളക്ക് ഒടുവില്‍ പെണ്ണിനെ ഞാന്‍ കണ്ടെത്തിയത് ഇതെ സ്ക്കൂളില്‍ വെച്ചാണ്. എങ്ങനെയെന്നോ? രണ്ട് വര്‍ഷം മുന്‍പ് ഗസ്റ്റ് ലക്‌ച്ചര്‍ ഇന്റര്‍വ്യൂവിന് വന്ന തരുണീമണികളില്‍ ഒന്നിനെ കണ്ടെത്തി; പ്രത്യേകം ഇന്റര്‍വ്യൂ ചെയ്ത്, സഹോദരപത്നിയാക്കി.

…
ജാതി ചോദിക്കാന്‍ വേണ്ടി ഇംഗ്ലീഷ് ഇഷ്ടമില്ലാത്ത ഞാന്‍ ഇംഗ്ലീഷ് ടീച്ചറുടെ അടുത്ത് കൂടി പഠിക്കാന്‍ തുടങ്ങി. ഒരുദിവസം സ്റ്റാഫ്‌റൂമില്‍ ഇരുന്ന് ഉച്ചഭക്ഷണം കഴിച്ചുകൊണ്ടിരിക്കെ ടീച്ചറോട് വീട്ടുകാര്യങ്ങള്‍ ഓരോന്നായി ചോദിക്കുന്ന കൂട്ടത്തില്‍ പതുക്കെ ചോദിച്ചു, “ടീച്ചറുടെ ജാതി ഏതാണ്?”

പെട്ടെന്ന് അവള്‍ ഭക്ഷണം മതിയാക്കി എഴുന്നേറ്റു. പിന്നത്തെ ഡയലോഗ് എല്ലാവരും കേള്‍ക്കെയാണ്. “ഇതൊരു വിദ്യാലയമല്ലെ; അദ്ധ്യാപകരല്ലെ, കുട്ടികള്‍ക്ക് മാതൃക കാണിക്കേണ്ടത്. ജാതിചോദിക്കുക, ഇത്രയും അധ:പതിച്ചവരാണോ ഇവിടെയുള്ള അദ്ധ്യാപകര്‍”.
ഇങ്ങനെയൊരു പ്രതികരണം ഞാനോ മറ്റുള്ളവരോ പ്രതീക്ഷിച്ചിരുന്നില്ല.

“ടീച്ചറേ ജാതി ചോദിക്കരുത്, പറയരുത്, വിചാരിക്കരുത്, എന്ന് മാത്രമാണ് ശ്രീനാരായണഗുരു പറഞ്ഞത്. അതുകൊണ്ട് ഒരു കടലാസില്‍ എഴുതി ചോദിച്ചാല്‍ ഉത്തരം എഴുതിത്തരും” രംഗത്തിന്റെ ചൂട് അല്പം കുറയ്ക്കാനായി സഹപ്രവര്‍ത്തകനായ പിള്ളമാസ്റ്റര്‍ പറഞ്ഞു.

…
അമളിപറ്റിയോ എന്നൊരു തോന്നല്‍ എനിക്കുണ്ടായി. പിന്നിട് നിശബ്ദമായ അന്തരീക്ഷത്തില്‍ എല്ലാവരും ഭക്ഷണം കഴിച്ചശേഷം ഫുള്‍സ്പീഡില്‍ ഫാന്‍ കറക്കി ഉച്ചവിശ്രമമായി. പിള്ള മാസ്റ്റര്‍ ഭക്ഷണം കഴിച്ച ശേഷം സ്ക്കൂളിന്റെ തെക്കുഭാഗത്തുള്ള ഇരുണ്ട മൂലയിലേക്ക് പോയി. അവിടെവെച്ച് ആരും കാണാതെ ഒരു സിഗരറ്റ് വലിച്ച ശേഷം സ്വന്തം സീറ്റില്‍ വന്നിരുന്നു.

അദ്ദേഹത്തിന്റെ സ്വന്തം മലയാളത്തില്‍ ഇംഗ്ലീഷ് ടീച്ചറോട് ചോദിച്ചു, “ടീച്ചറിന്റെ വീട് കൂത്തുപറമ്പ് ടൌണിനടുത്താണോ?”

“അല്ലല്ലോ, എന്റെ വീട് പയ്യന്നൂരിലാ” ടീച്ചര്‍ മറുപടി പറഞ്ഞു.

“ഓ ഞാനവിടെയൊക്ക കുറേക്കാലം ജോലിചെയ്തതാണല്ലോ. അക്കാലത്ത് ടൌണിനടുത്ത് ഒരു വീട്ടിലാണ് കുടുംബസമേതം താമസിച്ചത്. ടീച്ചറിന്റെ വീട്ടുപേര്?” പിള്ളയുടെ സംഭാഷണം എല്ലാവരും ശ്രദ്ധിക്കാന്‍ തുടങ്ങി.

“എന്റെ വീട് ടൌണിനടുത്ത് തന്നെയാ. എന്റെ വീട്ടുപേര് എല്ലാവര്‍ക്കും അറിയപ്പെടുന്നതാ,,, ‘വലിയവളപ്പില്‍” ടീച്ചർ മറുപടി പറഞ്ഞു.

“ആ വീട്ടുപേര് ഞാന്‍ അറിയുന്നതാണല്ലോ, ടീച്ചറിന്റെ അച്ഛന്റെ പേര്?” പിള്ള ബയോഡാറ്റ ശേഖരിക്കുകയാണ്.

“അച്ഛന്റെ പേര് ചന്ദ്രശേഖരന്‍ നമ്പ്യാര്‍ ; നാട്ടുകാര്‍ക്കെല്ലാം അറിയപ്പെടുന്ന വലിയ ബിസിനസ് കാരനാണ്” ടീച്ചര്‍ അഭിമാനത്തോടെ പറഞ്ഞു.

പിള്ളമാഷ് പൊട്ടിചിരിച്ചു. അത് കേട്ടപ്പോള്‍ അതുവരെ ഉറക്കം‌പിടിച്ച എല്ലാവരും എഴുന്നേറ്റ് പൊട്ടിചിരിക്കാന്‍ തുടങ്ങി.

“ജാതി ചോദിക്കാതെ തന്നെ പറയിക്കാന്‍ പഠിക്കണം” കൂട്ടച്ചിരിക്കിടയില്‍ പിള്ള എന്നോടായി പറഞ്ഞു.